મિલનના દીપક મિલનના દીપક સૌ બુઝાઈ ગયાં છે વિરહના તિમિર પણ ગહન થઈ ગયાં છે અભાગી નયન વાટ કોની જુએ છે હતાં સત્ય જે એ સ્વપન થઈ ગયાં છે મિલનના દીપક સૌ... અમારા સ્વપનનું એ સદ્ભાગ્ય ક્યાંથી સ્વપનમાં રહેલાં સુખો થાય સાચા કે આ વાસ્તવિક જગનાં સાચા સુખો પણ અમારા નસીબે સ્વપન થઈ ગયાં છે મિલનના દીપક સૌ... ઘણાંયે દુઃખો એ રીતે પણ મળ્યાં છે કે જેને કદી જોઈ પણ ના શક્યો હું ઘણીયે વખત નીંદમાં સૂઈ રહ્યો છું અને બંધ આંખે રુદન થઈ ગયાં છે મિલનના દીપક સૌ... નથી મેળવાતી ખુશી સંપત્તિથી આ મોજાં રડીને કહે છે જગતને ભીતરમાં જ મોતી ભર્યાં છે છતાંયે સમુન્દરનાં ખારાં જીવન થઈ ગયાં છે મિલનના દીપક સૌ... પ્રણયમાં મેં પકડ્યા'તા તમારા જે પાલવ પ્રણયની પછી પણ મને કામ આવ્યા પ્રસંગો ઉપરના એ પરદા બન્યાં છે ઉમંગો ઉપરના કફન થઈ ગયાં છે મિલનના દીપક સૌ... કવિ-દિલ વિના પ્રકૃતિના સિતમને બીજું કોણ 'બેફામ' સુંદર બનાવે મળ્યા દર્દ અમને જે એના તરફથી અમારા તરફથી કવન થઈ ગયાં છે મિલનના દીપક સૌ... સ્વરઃ મહમદ રફી ગીતઃ બરકત વિરાણી ‘બેફામ’ સંગીત: દિલીપ ધોળકીયા ચિત્રપટઃ સ્નેહ બંધન (૧૯૬૭) ક્લીક કરો અને સાંભળોઃ (નોંધઃ ગ્રામોફોન રેકોર્ડના જમાનામાં સ્વરબદ્ધ થયેલા આ ગીતમાં મૂળ ગીતની માત્ર બે કડી છે.) હવે સાંભળો સમગ્ર ગીત મનહર ઉધાસના મખમલી કંઠેઃ
|