[પાછળ]
અરે આ દાળ દાઝે છે!
(૧૯૩૮)

(અરે બેન, બસ વાત ન પૂછો.
ગઈ કાલે અમારે ત્યાં તો દાળનું 
પુરાણ ચાલુ થયું. લે સાંભળ.)

કહું  છું  કાલની કહાણી અરે આ દાળ દાઝે છે
સાંભળ બેન ઓ  શાણી અરે આ દાળ દાઝે છે

પ્રભાતે કારજ આટોપી  ગઈ  હું  નાથની  પાસે
નીચેથી સુર સંભળાયા   અરે આ દાળ દાઝે છે

કયાંથી   સાસુજી   ગરજ્યા
(કોણ ગરજ્યા?  સાસુજી?)
વહુજી   ક્યાં   ગઈ   બેટા 
એનું  નાક  છે  કે  નળીયું?
અરે   આ  દાળ  દાઝે   છે

બીજા કરતાં વધ્યાં સસરા, ખરેખર વેઠની આણી
એના કાન છે કે કોડિયાં? અરે આ દાળ દાઝે છે

જેઠાણી-જેઠ  આવીને  કહ્યું   માતાને  સમજાવી
વહુની આ જૂઓ કરણી, અરે આ દાળ દાઝે છે

દિયરજી દોડતાં આવે, કહ્યું: બા ભૂખ બહુ લાગી,
તું  અહીં    સંભાળ  અરે   આ  દાળ  દાઝે  છે

અરેરે બા, બધું શું આ, બબડતી આગમાં દલડી
ભાભી ક્યાં ગઈ  જૂઓ,  અરે આ દાળ દાઝે છે

આજ્ઞા નાથની  માગી  જ્યાં ઝટ  હું નીચે આવી
સૌ ત્યાં કડકડી ગરજ્યાં અરે  આ દાળ દાઝે છે

(હમણાં આટલું બધું  રમખાણ મચે
તોય શું રસોડું જોવા કોઈ ન જાય?)

(અરે પણ બેન, મેં દાળ ઓરી જ નો'તી
તો પછી દાળ દાઝે જ ક્યાંથી?
તો કોની દાળ દાઝી છે તે કહું, સાંભળ)

રસોડે ના  ગયું કોઈ  બની એદી  રહ્યા જોઈ
પડોશણે કહેલ ઢોસાનું અમારી દાળ દાઝે છે

ઉઠે પંડિત સકળ શૂરા સહુ  વાત એ  નહિ સમજ્યાં
ભૂલ ના કો દાળમાં વહુની તો સહુની દાળ દાઝે છે!!
 
સ્વરઃ પુષ્પા જે. સંપત અને સાથીદાર
રચનાઃ પંડિત કરસનદાસ

(ઈ.સ. ૧૯૩૮ની યંગ ઈન્ડિયા 
રેકોર્ડ નં. DA 5524 - NG 2382)
ક્લીક કરો અને સાંભળોઃ
અરે આ દાળ દાઝે છે ! 

આ પ્રાચિન રમુજી ગ્રામોફોન રેકોર્ડની
ઓડિયો ક્લીપ અને તેનું ચિત્ર ઉપલબ્ધ કરાવવા માટે
મુંબઈની Society of Indian Record Collectorsનો
ઘણો જ આભાર