હરિને ભજે તે રમતાં ભજે

હરિને ભજે તે રમતાં ભજે  એ કંઈ કરે ના આયાસ
નડે  જો  સંસારના બંધ તો  એની વધે  ઉલટ પ્યાસ
હરિને ભજે તે રમતાં ભજે

શૂરવીરતા  સિંહ  ના કેળવે  એ તો  જનમ સ્વભાવ
અનાયાસે તજે સઘળું છે  જેને હરિ ભજવાનો ભાવ
હરિને ભજે તે રમતાં ભજે

ગતિ છે જળની સાગરપેર  એ છાંડે તરુછાયાના વન
રાત અંધારે વગડે જઈ ચડે  જેનું હોય માધવમાં મન
હરિને ભજે તે રમતાં ભજે

તજ્યાના હુંપદવાળા ના તજે એ તો બને આપોઆપ
અજવાળાના એવા  સંગીને ક્યમ  દે અંધારા  થાપ
હરિને ભજે  તે  રમતાં  ભજે

એના  એ તંબૂરના  તારની  ખૂંટી   અનંતે   ખેંચાય
બેઠેલો  સંસારના  ચોકમાં  પદ  એ  મુકુન્દના ગાય
હરિને ભજે તે રમતાં ભજે
-મુકુન્દરાય વિ. પારાશર્ય