નેતિ નેતિ આ આવું છે, ને આટલું, એવું નહીં નહીં
બાકી રહે છે કેટલું, બીજું કંઈ કંઈ!
માણસમાં મૂક્યું મન; અરે, એ તો કમાલ છે
મન ન માટી-માટલું, બીજું કંઈ કંઈ!
જોયા કરે શું શૂન્યની સામે ટગર ટગર?
ના પ્રશ્ર્નનું એ પોટલું, બીજું કંઈ કંઈ!
બ્રહ્માંડ જેવું અન્ય અંડ સેવી એ શકે
સંઘરે આ કોચલું, બીજું કંઈ કંઈ!
દર્શન થશે તનેય તુંમાં એ અખિલનું
તું માત્ર નથી ચાટલું, બીજું કંઈ કંઈ!
જરીક ચિત્ત-પાર જૈ તું, તે તરાજુ તોલ
અહંનું મૂકી કાટલું, બીજું કંઈ કંઈ!
ઉશનસ્! તને જો આંખ, તો પર્દાની પાર જો
દાખે એ વસ્ત્ર ફાટલું, બીજું કંઈ કંઈ!
-ઉશનસ્
|