તિથિ ન જોશો ટીપણે

          માર્ગમાં કંટક પડ્યાં
          સૌને નડ્યાં
          બાજુ મૂક્યા ઊંચકી
          તે દી નકી
          જન્મ ગાંધી બાપુનો
          સત્યના અમોઘ મોંઘા જાદુનો

          તિથિ ન જોશો ટીપણે
          ગાંધી જયંતિ તે દિને

          અન્યાય નીચી મૂંડીએ
          ના લીધો સાંખી
          દુર્ગંધ પર મૂઠી ભરીને
          ધૂળ નાખી
          ઉકરડો વાળી-ઉલેચી
          સૃજનનું ખાતર રચ્યું
          અબોલા ભંગાવવા-
          એ વાતમાં મનડું મચ્યું
          કંઈક આમાંનું બને
          ગાંધી જયંતિ તે દિને

          તિથિ ન જોશો ટીપણે
          ગાંધી જયંતિ તે દિને

          મુર્ખને લીધા નભાવી
          ધુર્તને યોજ્યા જગતકલ્યાણના
          પથમાં પટાવી
          હૈયું દીધું તે દીધું
          પાછા વળી- ખમચાઈ ના કંઈ
          ગણતરીથી સાંકડું કીધું
          દૂભ્યાં-દબાયાં કોઈનું
          એકાદ પણ જો આંસુ લૂંછ્યું
          દાખવ્યું ઘર મનુજ કેરા
          માહ્યલાંને વણપૂછ્યું
          હૃદય જો નાચી ઊઠ્યું
          અન્યના સાત્વિક સુખે

          તિથિ ન જોશો ટીપણે
          ગાંધી જયંતિ તે દિને

       -ઉમાશંકર જોશી