બીજું હું કાંઈ ન માગું
આપને તારા અંતરનો એક તાર
બીજું હું કાંઈ ન માગું
સુણજે આટલો આર્ત તણો પોકાર
બીજું હું કાંઈ ન માગું
તુંબડું મારું પડ્યું નકામું
કોઈ જુએ નહિ એના સામું
બાંધી તારા અંતરનો ત્યાં તાર
પછી મારી ધૂન જગાવું
સુણજે આટલો આર્ત તણો પોકાર
બીજું હું કાંઈ ન માગું
એકતારો મારો ગુંજશે મીઠું
દેખશે વિશ્વ રહ્યું જે અદીઠું
ગીતની રેલશે એક અખંડિત ધાર
એમાં થઈ મસ્ત હું રાચું
આપને તારા અંતરનો એક તાર
બીજું હું કાંઈ ન માગું
- ભાનુભાઈ વ્યાસ ‘બાદરાયણ’
|