ચંપામાસી ?!
માથામાં મણ-મણનું કોપરેલ નાંખ્યું ને
ચોટલી બે બાંધી છે પાછી,
બોલો, લાગું ને સાવ ચંપામાસી?!
મમ્મીના સેન્ડલ ચડાવીને ઘરમાં
હું ટપ્-ટપ્ ચાલું કેવી વટથી;
મોઢા પર લાલી-કાજળના લપેડા
આપણે તો કાયમની મસ્તી,
મમ્મીનો દુપટ્ટો ખોવાયો હોય તો
સમજી લો, પહેરું છું સાડી.
બોલો, લાગું ને સાવ ચંપામાસી?!
ચાંપલી-ચમેલી કહી પપ્પા ચિડાવે પણ
લાગે ન સ્હેજ મને ખોટું,
પપ્પાને એમ કે હું ભેંકડિયા તાણીશ
પણ ડેડી! આ બચ્ચું છે મોટું;
મમ્મી આ ખેલ જોઈ દૂરથીને દૂરથી
આપે છે મને શાબ્બાશી.
બોલો, લાગું ને સાવ ચંપામાસી?!
(૦૮-૦૩-૨૦૧૮)
-વિવેક મનહર ટેલર
|