મોરલાને વેઠ્યો ન જાય વરસાદમાં
ઘેનની ઘૂંટી પાઈ રોમ રોમ આ રતમાં
રાખી શકાય મરજાદમાં?
મોરલાને વેઠ્યો ન જાય વરસાદમાં
મીઠેરા ગહેકારે મોભથી સરી આવ્યાં
સેંકડો ગરોળીના ગલ
વિરહાકુલ હૈયાની ક્યારીમાં રેલાયાં
વખડે વલોવાયાં જલ
કેટલાય હાયકાર બાઝ્યાનો અંદેશો
છૂટા પડેલ એક સાદમાં
મોરલાને વેઠ્યો ન જાય વરસાદમાં
વાડામાં શ્રાવણનાં ઝરમરિયાં ઝૂલે
ને આંગણે અષાઢની હેલી
ભૂંડા ભાદરવા, તું જોવા ન પામશે
ગારાની ભીંત આ ઊભેલી
વનના ને મનના મોરલિયાનું સહિયારું
સાવ રે સુંવાળા અપરાધમાં
મોરલાને વેઠ્યો ન જાય વરસાદમાં
આખા તે ઘરની એકલતાને લીધો છે
ભીનાશે કારમો ભરડો
કાને અથડાઇ કૂંણી કાંટાળી ડાળ
પડ્યો હૈયામાં ફૂલ-શો ઉઝરડો
આખાયે માળાને મ્હેકતો કરી મેલ્યો
પંખીએ પંખીની યાદમાં
મોરલાને વેઠ્યો ન જાય વરસાદમાં - ‘ગની’ દહીંવાલા
|