માત-પિતા છે મહાન

જગતમાં  માત-પિતા છે મહાન, માત-પિતા છે મહાન
પહેલા  આવે  માત-પિતા  ને  પછી  આવે  ભગવાન
આપ્યું, આપ્યું,   કદી ન માપ્યું,   માગ્યું  કદી ન માન
જોડ  જડે  નહિ  જગમાં  એની  કરીએ  સૌ સન્માન

આજ  આપણે  મોટા  થયા  ને  કર્યા કંઈ  મોટા કામ
જનમ દીધો છે  એમણે  ત્યારે  પામ્યા  જગમાં  નામ
આપણા ઘરમાં કેમ ન હો  જેના હૈયે આપણું સ્થાન?

જગદીશ્વરને  જોયા  નથી,  પણ  આવે  એક  વિચાર
જેણે   સર્જ્યા   માત-પિતા   એ   વંદનના   હક્કદાર
માત-પિતાની  કરીએ  આરતી, અવસર  છે અણમૂલ
માતપિતાથી  કોઈ  ન  મોટું,  માફ  કરજે  ભગવાન!

-તુષાર શુક્લ