આજ અંધાર ખુશબોભર્યો

આજ અંધાર ખુશબોભર્યો લાગતો,
આજ સૌરભભરી રાત સારી;
આજ આ શાલની મંજરી ઝરી ઝરી,
પમરતી પાથરી દે પથારી.
આજ અંધાર ખુશબોભર્યો લાગતો.

આજ ઓ પારથી ગંધને લાવતી,
દિવ્ય કો સિંધુની લહરી લહરી;
આજ આકાશથી તારલા માંહીંથી
મ્હેંકતી આવતી શી સુગંધી!
આજ અંધાર ખુશબોભર્યો લાગતો.

ક્યાં, કયું પુષ્પ એવું ખીલ્યું, જેહના
મઘમઘાટે નિશા આજ ભારી?
ગાય ના કંઠ કો, તાર ના ઝણઝણે:
ક્યાં થકી સૂર કેરી ફૂવારી ? 
આજ અંધાર ખુશબોભર્યો લાગતો.

હૃદય આ વ્યગ્ર જે સૂર કાજે હતું
હરિણ શું, તે મળ્યો આજ સૂર?
ચિત્ત જે નિત્ય આનંદને કલ્પતું,
આવિયો તે થઈ સુરભિ-પૂર? 
આજ અંધાર ખુશબોભર્યો લાગતો.
-પ્રહ્‌લાદ પારેખ
ક્લીક કરો અને સાંભળો
ચિંતન પંડ્યાના સ્વરાંકનમાં અને
દર્શન જોશીના સ્વરમાં
આ કવિતાની અદ્‌ભુત રજૂઆત
આજ અંધાર ખુશબોભર્યો 

(આ ઓડિયો ક્લીપ લોકપ્રિય વેબસાઈટ
www.tahuko.com
પરથી સાભાર લેવામાં આવી છે.)