વાહ અમલદારી!
બની અધિકારમાં અંધા, મિજાજે રે પૂરા બંદા
કૂડા કરમે પૂરા ખંધા, અમારી એ અમલદારી
પ્રજાના પીંડમાં પેસી, અમે તો રક્ત પીનારા
અમારા એ શુચિ ધારા, અમારી એ અમલદારી
અમારા માનની ખાતર, ભલે ઊંધી વળે દુનિયા
છતાં ના તેહની પરવા, અમારી એ અમલદારી
ખુશામત જે કરે રુડી, ફિરસ્તા તે અમારા છે
જીગર કુરબાન તે પર છે, અમારી એ અમલદારી
ન પરવા ન્યાય નીતિની, ન પરવા રાજ્ય રીતિની
ન હો અમને કદા ભીતિ, અમારી એ અમલદારી
કરે તરબોળ ખિસ્સા જે, અમારી રે'મ તે નજરે
અવર ચઢતા શૂળી કલમે, અમારી એ અમલદારી
કમાવા દ્રવ્યની આશે, કદા જો શાહ દંડાશે
અમારું તોય શું જાશે? અમારી એ અમલદારી
ન કો મિત્રો, ન કો શત્રુ, અમારે છે બધાં સરખાં
દીએ જર મિત્ર, પર શત્રુ, અમારી એ અમલદારી
ખુદાઈ હુક્મ કો તોડે, હઠાવે યમદૂતો કોઈ
અધિન આલમ કરાવા, બસ અમારી છે અમલદારી
(ઈ.સ. ૧૯૨૧)
-પટેલ જોઈતારામ ભગવાનદાસ કઠલાલકર |