અમે ભીંત ફાડીને ઊગી જવાના

અમે   રાખમાંથીયે   બેઠા   થવાના,
જલાવો  તમે  તોયે  જીવી   જવાના.

ભલે જળ  ન  સીંચો  તમે તે છતાંયે,
અમે  ભીંત  ફાડીને  ઊગી  જવાના.

ધખો  તમતમારે  ભલે  સૂર્ય  માફક,
સમંદર ભર્યો  છે, ન  ખૂટી  જવાના.

ચલો  હાથ   સોંપો, ડરો  ન લગીરે,
તરી પણ  જવાના ને  તારી જવાના.

અમે જાળ માફક ગગન આખું ઝાલ્યું,
અમે  પંખી  એકે   ન  ચૂકી જવાના!
-હર્ષ બ્રહ્મભટ્ટ
ક્લીક કરો અને સાંભળોઃ
Ame_Bhint_Fadi_Ne-Hema&Ashit_Desai-
Harsh_Brahmbhatt.mp3