[પાછળ]
વૃક્ષની વસતીગણતરી

કેડ પર જંગલ ખાતાએ
ગેરુઆ રંગના પટ્ટા પહેરાવ્યા
તેના પર વીંછીવઢ આંકડાનો ડંખ
ધ્રૂજી ઊઠ્યાં અંગેઅગ
વનોમાંય થઈ રહી અમારી વસતીગણતરી?
વૃક્ષાળતા કંપી સાશંક :
આપણે હવે કોક ચોપડાનો અંક!

કોઈ અજાણ્યા પથિકને
છાંયડી દીધાનો ય
હવે નોંધાશે ગુનો?
તૂટી રહ્યો આભનો પણ સંબંધ જૂનો

રેતીમાં તરફડતી મૃતપ્રાય નદીને કાંઠે
વસીને કેમ જોયા કરવી તેની તરસ?
અમે થોડાંક ભાગીને આવ્યાં
આ તમારા આંકેલા મલકમાં
તો તમે દારોગાની જેમ
ઊભા રાખી દીધા અમને બાગબગીચે!

આ આસ્ફાલ્ટના રસ્તાને કાંઠે
ખોડાઈને ખાલી ચડી છે પગે
ડાળ પર પંખી આવીને બેસે
તેનોય નથી રહ્યો વનાળ રોમાંચ
અહીં રહી રહીને તો લાગે છે ઔપચારિક
આ ઋતુ ઋતુની આવનજાવન
લાવો, ક્યાં છે અમારાં વનેવન?
-ભાનુપ્રસાદ પંડ્યા