નયણાં
ઊના રે પાણીના અદ્ભુત માછલાં-
એમાં આસમાની ભેજ,
એમાં આતમાનાં તેજ;
સાચાં તો યે કાચાં જાણે કાચનાં બે કાચલાં:
ઊના રે પાણીના અદ્ભુત માછલાં.
સાત રે સમંદર એના પેટમાં-
છાની વડવાનલની આગ,
અને પોતે છીછરાં અતાગ:
સપનાં આળોટે એમાં છોરુ થઈને ચાગલાં:
ઊના રે પાણીના અદ્ભુત માછલાં.
જલના દીવા ને જલમાં ઝળહળે,
કોઈ દિન રંગ ને વિલાસ,
કોઈ દિન પ્રભુ તારી પ્યાસ:
ઝેર ને અમરત એમાં આગલાં ને પાછલાં
ઊના રે પાણીના અદ્ભુત માછલાં.
-વેણીભાઈ પુરોહિત
ક્લીક કરો અને સાંભળોઃ
|