આપણા દુ:ખનું કેટલું જોર?
ભાઈ રે, આપણા દુ:ખનું કેટલું જોર?
નાની એવી જાતક વાતનો
મચવીએ નહિ શોર!
ભારનુ વાહન કોણ બની રહે?
નહી અલૂણનું કામ,
આપણ તો બડભાગી,
ખમીરનું આજ ગવાય રે ગાન;
સજલ મેઘની શાલપે સોહે
રંગધનુષની કોર.
ભાઈ રે, આપણા દુ:ખનું કેટલું જોર?
જલભરી દૃગ સાગર પેખે,
હસતી કમળફૂલ,
કોકડું છે પણ રેશમનું,
એનું ઝીણું વણાય દુકૂલ;
નિબિડ રાતના કાજળ પાછળ
પ્રગટે અરુણ ભોર.
ભાઈ રે, આપણા દુ:ખનું કેટલું જોર?
આપણે ના કંઈ રંક,
ભર્યોભર્યો માંહ્યલો કોશ અપાર;
આવવા દો જેને આવવું આપણે,
મૂલવશું નિરધાર;
આભ ઝરે ભલે આગ,
હસી હસી ફૂલ ઝરે ગુલમ્હોર.
ભાઈ રે, આપણા દુ:ખનું કેટલું જોર?
-રાજેન્દ્ર શાહ
ક્લીક કરો અને સાંભળો
અજિત શેઠના સંગીત નિર્દેશનમાં
અને હરિહરનના સ્વરમાં આ રચનાઃ
|