એક્વેરિયમમાં તરે છે
એક્વેરિયમમાં તરે છે માછલી
ન જિંદગી સ્મરે છે પાછલી?
અહીં પ્રકાશ
કિંતુ સૂર્યનો નહીં, ‘નિયોન’ પાશ
ને સમુદ્રનું જ જલ
પરંતુ અહીં તરંગનું ન બલ
નેત્રરાંકડી છતાં ય પુચ્છ વાંકડી
ન જાણતી કે સૃષ્ટિ સાંકડી
અહીં કઠોર, કાંકરેટ કાચની
નઠોર, જૂઠ સૃષ્ટિ આ ન સાચની
વેંતવેંતમાં જ ગાઉ ગાઉ માપવા
અને ન ક્યાં ય પહોંચવું
સદા ય વેગમાં જ પંથ કાપવા
ન થોભવું, ન શોચવું
મનુષ્ય
(કાચ પાર હું સમાં ઘણાં અહીં ફરે)
ન કોઈ જેમનાં પ્રદર્શનો ભરે!
કને જ આ કલા ભણી
અગમ્ય શી ગણી
તરે છે માછલી
ન જિંદગી સ્મરે છે પાછલી!
-નિરંજન ભગત |