| [પાછળ] |
અકારણે આજ મારું મન
અકારણે આજ મારું મન ઘેલું ઘેલું થાય!
મૂંગું રહેવા જેમ મનાવું તેમ એ વ્હેલું ગાય!
મારે અધરે સ્મિત ફૂટે
તો ઝાકળ થૈને છાય,
નેનમાંથી જો નીર છૂટે
તો હસી હસી ન્હાય;
વણજોયાને વ્હાલ કરે ને નિજનાને ના ચ્હાય!
અકારણે આજ મારું મન ઘેલું ઘેલું થાય!
લોકની માયા શીય કીધી
તે નિજમાંયે ના માય,
કોકની છાયા જોઈ લીધી
કે ચરણ ચૂમવા જાય;
ક્યારેય જે ન નોતરે એને ઘેર એ પ્હેલું જાય!
અકારણે આજ મારું મન ઘેલું ઘેલું થાય!
(૧૯૪૮)
-નિરંજન ભગત |
| [પાછળ] [ટોચ] |