તજવો ના સંગાથ!
રુદિયાની ઓળખ જેની સાથ,
એનો તજવો ના, તજવો ના સંગાથ;
મેળવિયો હેતે જેનો હાથ,
એનો તજવો ના, તજવો ના સંગાથ.
દુનિયાની પારના ઓ ઊજળા હો દેશ, તો યે
રજ આ ધરતીની ના તજાય;
આવે સૂરજ-ચાંદાના નભથી સંદેશ, તો યે
ઘરનો દીવો ના હોલવાય:
રુદિયાની ઓળખ જેની સાથ,
એનો તજવો ના, તજવો ના સંગાથ;
મેળવિયો હેતે જેનો હાથ,
એનો તજવો ના, તજવો ના સંગાથ.
નાનકડા ઘરનો વાંકોચૂકો હો ઊંબરો, પણ
ડુંગર પર વાસ ના વસાય;
ઊંચે રે ઊંચે ગાજે મેળો વાદળિયો, તો પણ
ઊંધી ગાગર રે ના વળાય :
રુદિયાની ઓળખ જેની સાથ,
એનો તજવો ના, તજવો ના સંગાથ;
મેળવિયો હેતે જેનો હાથ,
એનો તજવો ના, તજવો ના સંગાથ.
પેલી ગમ પથરાયાં હો વનરાવન ગાઢ, તો યે
આંગણની છાંય ના હરાય;
વાટે ઘાટે નીરખ્યાં હો લોચનિયે વ્હાલ, તો યે
નિજનાં ના વેગળાં કરાય:
રુદિયાની ઓળખ જેની સાથ,
એનો તજવો ના, તજવો ના સંગાથ;
મેળવિયો હેતે જેનો હાથ,
એનો તજવો ના, તજવો ના સંગાથ.
(કુમાર ૧૯૫૭)
-હસિત બૂચ |