ડગલું ભર્યું કે પાછું ના હઠવું ના હઠવું

ડગલું ભર્યું કે ના હઠવું ના હઠવું;
વેણ કાઢ્યું કે ના લટવું ના લટવું.
 
સમજીને  તો  પગલું   મૂકવું   મૂકીને  ના  બીવું;
જવાય જો નહિ આગળ તોયે  ફરી ના પાછું લેવું.

સંકટ  મોટું  આવી પડતાં  મોઢું  ન  કરવું વીલું;
કળે બળે  ખૂબ લડવું પણ  ના ફરવું કરવા ઊંધું.

જ્યાં ઊભા ત્યાં  ચોંટી રહીને વચન  લેવું સબળું;
આભ પડો કે પૃથ્વી ફાટો  તોય ન કરીએ નબળું.

ફતેહ કરીને આગળ વધશું અથવા અહીંયાં મરશું;
પણ   લીધેલું   તે   પાળીશું   રે  વજ્જરનું  કરશું.

તજી  હામ ને  ઠામ  મૂકવા  ખૂણા  જે  કો  ખોળે;
ધિક કાયર  રે  અપજશરૂપી  ખાળકૂંડીમાં  બોળે.
-કવિ નર્મદ