અમે ભરતભૂમિના પુત્રો!
અમે ભરતભૂમિના પુત્રો, અમ માત પુરાણ પવિત્ર,
રે જેનાં સુંદર સૂત્રો ઝળકાવે ઉચ્ચ ચરિત્ર;
અમ અંતરને ઉદ્દેશી કરશું હોકાર હંમેશ,
અમે હિંદી હિંદી હિંદી! ઓ દિવ્ય અમારો દેશ.
અંધાર વિશ્વે અથડાતાં કે ફરતાં ભવ્ય પ્રકાશ,
પડતાં રડતાં રગડાતાં કરતાં હાસ્યવિલાસ;
પળપળ અમ ઉરનિધિએ શી હા ઊછળે ઊર્મિ અશેષ,
અમે હિંદી હિંદી હિંદી! ઓ દિવ્ય અમારો દેશ.
ક્યાં હશે હિમાલય જેવો, ક્યાં પુણ્ય પવિત્ર જ ગંગ,
ક્યાં મળે અલૌકિક એવા સહુ દેશતણાં બહુ રંગ;
ક્યાં મુનિ ઈશ્વરજન બેસી કરતા પ્રભુપંથ ઉજેશ,
અમે હિંદી હિંદી હિંદી! ઓ દિવ્ય અમારો દેશ.
ક્યાં રામ-યુધિષ્ઠિર ઘૂમ્યાં, ક્યાં ગર્જ્યા અર્જુન-ભીમ,
ક્યાં રજપુતવીર ઝઝૂમ્યાં બળ દાખવવા અસીમ;
એ ભૂલીએ તે રીતે શી અમ અંતરથી લવલેશ,
અમે હિંદી હિંદી હિંદી! ઓ દિવ્ય અમારો દેશ.
નથી રે જીવવું પર આશે, છે પારકી આશ નિરાશ,
નથી કર ધરવો કો પાસે, સ્વાશ્રયનો છે ઉલ્લાસ;
કંઈ પુણ્યપ્રભા જ પ્રવેશી અહીં દે અમને ઉપદેશ,
અમે હિંદી હિંદી હિંદી! ઓ દિવ્ય અમારો દેશ.
ધમ ધમ ધરણી ધ્રૂજવશું અમ દેશતણાં કરી ગાન,
જય જય જયનાદ કરીશું, દઈશું મોંઘા અમ પ્રાણ;
એ ભક્તિ વસી ઉર, તે શી દેજો શક્તિ પરમેશ,
અમે હિંદી હિંદી હિંદી! ઓ દિવ્ય અમારો દેશ.
-અરદેશર ફરામજી ખબરદાર |