અમર હમણાં જ સૂતો છે

પવન, ફરકે તો એ રીતે ફરકજે,  પાન ના ખખડે!
કોઈને સ્વપ્નમાં માગી,  અમર હમણાં જ સૂતો છે.

દવા તો  શું  હવે  સંજીવની  પણ કામ નહિ આપે,
જીવનના ભેદને પામી,   અમર હમણાં જ સૂતો છે.

મિલન-દૃશ્યો  હવે  તડપી રહ્યાં  છે  કરવટો લઈને,
વિરહના રંગમાં  રાચી,  અમર હમણાં જ સૂતો છે.

ગગન પ્રગટાવ તુજ  દીવડા, નહીં લાગે હવે ઝાંખા,
નયનનાં  દીપને  ઠારી,   અમર હમણાં જ સૂતો છે.

ગગનનાં  આંસુઓ  માયાં નહીં  ધરતીના પાલવમાં,
પ્રભાતે જ્યાં ખબર આવી અમર હમણાં જ સૂતો છે.

અમર જીવન  છે  એવું  કે  જીવન ઓવારણાં લે છે,
મરણના માનને  રાખી,   અમર હમણાં જ સૂતો છે.

કહ્યું  શત્રુઓએ   મિત્રોને,  કરો  ઉત્સવની  તૈયારી,
રહી ના જાય કાંઈ ખામી, અમર હમણાં જ સૂતો છે.

ગયો  એ  હાથથી  છટકી,  હવે  શું બાંધશે દુનિયા!
બધાંયે  બંધનો  ત્યાગી,   અમર હમણાં જ સૂતો છે.

ન જાગે એ રીતે ઊંચકી ને એને લઈ જજે, દુનિયા!
સમયની કૂચમાં  થાકી,  અમર હમણાં જ  સૂતો છે.

ન  જાએ  કોઈ  ખાલી  હાથ  મારા  આંગણે આવી,
અમર  એથી મરણ આવ્યું, તો બસ મરવું પડ્યું મારે.
-અમર પાલનપુરી
ક્લીક કરો અને સાંભળો આ ગઝલના થોડા શેર
અમર પાલનપુરીના જ સ્વરમાં