મનસૂર હજી પણ જીવે છે!

હું  મૌન   રહીને   એક   અનાહત  નાદ  ગજાવી  જાણું  છું;
ભરનિદ્રામાં  પણ     સૂતેલો     સંસાર   જગાવી  જાણું  છું.    ..૧

મુજ અંતર  બાળી  બાળીને  એક  જ્યોત  જલાવી  જાણું  છું;
બરબાદ   થતાં   પણ   બીજાને  આબાદ   બનાવી  જાણું  છું.   ..૨

હું  ફૂલ  ખિલાવી   જાણું   છું   ફૂલબાગ   લગાવી  જાણું  છું;
ત્યાં  કાળે  કહ્યું  કે  ગર્વ  ન કર  હું  ભસ્મ બનાવી  જાણું  છું.   ..૩

કોઈ ધર્મ નથી,  કોઈ કર્મ નથી,  કોઈ જ્ઞાન નથી,  અજ્ઞાન નથી;
તું  બુદ્ધિ  છોડી  બેસ  તો   હું   સહુ  ભેદ  બતાવી  જાણું  છું.  ..૪

અનુભવની  વાતો  શું  પૂછે,  વાણીમાં  અનુભવ  નહીં  આવે;
હું  એમ  તો   મારા  અનુભવમાં   ઈશ્વરને   લાવી  જાણું  છું.   ..૫

મનસૂરને   ફાંસી   દેનારા!   મનસૂર  હજી   પણ   જીવે   છે;
હું  માનવના   હર  શ્વાસ  મહીં   મનસૂર   બતાવી  જાણું  છું.   ..૬

હું   બોલો  બોલી  પાળું  છું  –  તું  બોલો  બોલી  બદલે  છે;
તું  વાત   બનાવી   જાણે  છે,  હું   વાત  નિભાવી  જાણું  છું.   ..૭

તારી  આંખોમાં   જ્વાળા  છે,   મારી   આંખોમાં   અશ્રુ   છે;
તું  આગ  લગાવી   જાણે  છે,   હું   આગ  બુઝાવી જાણું  છું.   ..૮

ઓ  પ્રેમ  રમતના  રમનારા,   તું    પ્રેમ  રમતને   શું  સમજે;
તું   આંખ  લડાવી  જાણે   છે,   હું   પ્રાણ  લડાવી  જાણું  છું.   ..૯

આભાર   ભરેલા   મસ્તકને   ઊંચકવું   ‘શયદા’  સ્હેલ  નથી;
હું    એમ  તો  મસ્તીમાં   આવી   આકાશ  ઉઠાવી  જાણું  છું. ..૧૦
         -હરજી લવજી દામાણી ‘શયદા’

ક્લીક કરો અને સાંભળોઃ
Hun_Maun_Rahi_Ne-Nayan_Pancholi-Shayda.mp3

(Audio clip source : http://rankaar.com/blog/archives/1369)