જીવન જ્યોત જગાવો!
જીવન જ્યોત જગાવો!
પ્રભુ હે! જીવન જ્યોત જગાવો!
ટચૂકડી આ આંગળીઓમાં ઝાઝું જોર જમાવો;
આ નાનકડા પગને વેગે ભમતાં જગત બતાવો;
અમને રડવડતાં શિખવાડો!
પ્રભુ હે! જીવન જ્યોત જગાવો!
વણદીવે અંધારે જોવા આંખે તેજ ભરાવો;
વણજહાજે દરિયાને તરવા બળ બાહુમાં આપો;
અમને ઝળહળતાં શિખવાડો!
પ્રભુ હે! જીવન જ્યોત જગાવો!
ઊગતાં અમ મનનાં ફૂલડાંને રસથી સભર બનાવો;
જીવનનાં રંગો ત્યાં ભરવા પીંછી તમારી ચલાવો;
અમને મઘમઘતાં શિખવાડો!
પ્રભુ હે! જીવન જ્યોત જગાવો!
ઉરની સાંકલડી શેરીના પંથ વિશાળ રચાવો;
હૈયાના ઝરણા નાનાને સાગર જેવું બનાવો;
અમને ગરજતાં શિખવાડો!
પ્રભુ હે! જીવન જ્યોત જગાવો!
અમ જીવનની વાદળી નાની આભ વિશે જ ઉડાવો;
સ્નેહ-શક્તિ-બલિદાન-નીરથી ભરચક ધાર ઝરાવો;
અમને સ્થળ-સ્થળમાં વરસાવો!
પ્રભુ હે! જીવન જ્યોત જગાવો!
જીવન જ્યોત જગાવો!
પ્રભુ હે! જીવન જ્યોત જગાવો!
-સુન્દરમ્
ક્લીક કરો અને સાંભળોઃ
|