આ તો ભાઈ ઠીબનાં પાણી!
આ તો ભાઈ ઠીબનાં પાણી!
તરસી પાંખને કો'ક દી ઊંડી આરત લાવે તાણી
આ તો ઠીબનાં પાણી
ન્હોય નદીનાં નીર કે એમાં ઊમટે ઘમ્મરપૂર
થીર ના હોય કોઈ તળાવ કે એમાં ઊગવાં કમળફૂલ
તરસ્યું કોઈ આવશે-
ખોબો'ક રેડવા, એટલું જાણી
આ તો ઠીબનાં પાણી
કોઈ દી એને કાંઠડે નહીં વસવાં નગર-ધામ
કૉળવાં નહીં વંન, કે લીલાં મંન
કે ટગર ફૂલ-શાં ભીનાં નામ
થાક ભરેલા પળનો પોરો પામતાં એ જ કમાણી
આ તો ઠીબનાં પાણી
કોતર-કાંઠા બેટ કે ભાઠા કોઈ નહિ અસબાબ
ઢળતું માથે છાપરું,
ઝૂકે ડાળખી અને ચાંગળું તરે આભ
નેહની ભીની મટકીમાંથી ખેવના કેરી લ્હાણી
આ તો ઠીબનાં પાણી
-હરિકૃષ્ણ પાઠક |