ભૂલી પંથ ભમું દિનરાત
ભૂલી પંથ ભમું દિનરાત રે,
કોઈ સંત! બતાવો જી વાટ
ઊગે સૂરજ વળી આથમે એવી ન્હોતી મારી મૂળ ભોમ;
જ્યોતિ અખંડ ઝગે જહીં જેનાં તેજ ઢળે વીંધી વ્યોમ:
કોઈ સંત બતાવો એ વાટ
સંસારને ઊને વાયરે થાયે ઘરઘરના દીપ ગૂલ:
જીવન એવાં અહીંનાં વ્હેંતિયાં, મારે મુલક અમરોનાં કુળ:
કોઈ સંત બતાવો એ વાટ
ઉષાને અધરે ખીલતો ને સંધ્યાને કાંઠે વિલાય:
એવા રે સ્નેહને સોણલે મારું જીવતર ઝોલાં ખાય:
કોઈ સંત બતાવો દિવ્યવાટ
પગલે પગલે પાવક પ્રજળે; ને આંખે ઠર્યો અંધકાર;
પામર દેહની પીઠ રહી વહી ભવરણ કેરો ભાર:
હવે સંત! દોરો સુરવાટ:
સ્વરઃ ઉષા મંગેશકર
ગીતઃ કેશવ હ. શેઠ
સંગીતઃ પુરુષોત્તમ ઉપાધ્યાય
ક્લીક કરો અને સાંભળોઃ
|